#حكايه_ورا_كل_باب#قصه_الأوراق_القديمه_وروح_حماتى٢

انا كنت مشغوله بالمكالمه وهو نازل زن وعياط عشان افتح له الصندوق..خلصت المكالمه بعد ما وعدونى أنه فى خلال يومين هيكون النت شغال. وانتبهت لأكرم اللى اخد الصندوق تانى ورجع دخله تحت سرير حماتى وبطل زن من نفسه.. فى نفس الوقت  لاقيت خالد  بيفتح باب الشقه وبيدخل واتلهينا ونسيت أسأله إيه اللى فى الصندوق وليه مقفول بقفل ؟ لما فرحنى  وقالى خلاص اشترى  أرض مساحتها كبيرة جزء هيعمله بيت لينا والجزء التانى هيعمل عليه  شركه خاصه بيه عشان يكون جنبى انا وابنه عدى كم يوم وفعلا النت أشتغل وحاولت أشغل نفسى شويه وأسليها 

بس  مجاش فى بالى أقول لخالد إنى وصلت النت وشغلت الخط الأرضى كمان   عادى يعنى فى أمور كتير كنت بعملها من غير ما أرجعله هو اللى عودنى على كدة إنها أمور تاففه وبلاش أوجع دماغه بيها ..

أبتديت أخد على البيت وأحس فيه إنى عشت فيه طول حياتى 

فيه ريحه الدفا  والأمان كدة عكس ماكنت  متوقعه يمكن عشان أبوة وأمه. عاشوا فيه طوال حياتهم وكان فى قصه حب بينهم شديدة ..اللى أنا نفسى خالد أحس بس منه بكلمه حنينه أو نظرة أو طبطبه بس عليا لما أكون تعبانه أو حاسه بتعب ..

 كنت  سمعت منه كتير أزاى حمايا  كان  بيأكل حماتى أو بيسقيها وكنت كل ما أجى أتكلم والمح حتى له إنك المفروض تتعامل معايا كدة بلاقى نفسى أسكت ولا بتكلم لأنه المفروض من نفسه يكون كدة، بس أوقات  كنت بتمنى أنه يعاملنى زى ما أبوة بيعامل أمه بس بعد ٥ سنين  جواز ولا مرة قالى حتى  كلمه  بحبك...هيأكلنى  ولا يسقينى أزاى! دة عمرة حتى  ما بيبص ليا زى أى راجل بيبص لمراته بحب أومال هو اتجوزنى ليه؟

 . أنا بتفرح على أى مسلسل فيه مشاهد حب من دى بتمنى خالد حتى يعمل حاجه منها ولا أى حاجه وحاولت كتير أفتح دة معاه  مش بيدينى أى فرصه

فبسكت  تانى وتالت  متفكروش أنى مش بحاول  بس بحاول أصبر نفسى أن جوازنا جه بسرعه، وهو طول الوقت شغل وفى البيت لاأما نايم أو بردوة قاعد بيخلص شغل متأخر عليه،

 انا لولا أكرم أبنى كنت زمانى  طقيت من الوحدة..بس بردوة أنا لازم اخليه يتغير ويحبنى .بس رجعت سألت نفسى .هو أنا بحب خالد؟

 بس مش عارفه أكيد بحبه أومال مستحمله ليه أنه على طول بعيد عنى..بس فعلا هو أنا بحبه ولا دة عشان العشرة وبس.. رحت فى النوم وأنا بفكر أزاى أخلى علاقتى مع خالد تتحسن وأنى أخليه يقعد معايا أطول  وقت أنا وأكرم ،

وعدى كم يوم ولاقيت ميادة وسارة اصحابى بيعزمونى على عيد ميلاد  بناتهم   لأنهم ولدوا فى نفس اليوم وكل سنه قرروا يعملوه مع بعض  فرحت جدآ ياااه أخيرا أرجع تانى لطبيعتى وأتفسح وأخرج وأقابل أصحابى زى زمان.. أخدت أكرم وقلت لازم أنزل أشترى  هدايا للبنات ومنها أتفسح واشترى  لأكرم كمان كم لعبه  لأننا رجعنا بسرعه وسيبنا كل العابه هناك 

رجعت البيت وكان يوم جميل قضيته مع أكرم .دخلت الشقه وشميت ريحه جميله أوى  فكرت خالد جه  وجايب برفيوم جديد .قعدت أنادى عليه  وأدور فى الاوض مش لاقياه بس لما دخلت أوضه حماتى  الريحه زادت جدا  ولاقيت النور قطع 

خفت وأتخضيت!!

 ايه اللى حصل ؟

أكرم .فضل يعيط وأنا الحمد لله كنت ماسكه الموبيل فى أيدى فتحت الكشاف بسرعه  عشان أكرم يشوفنى ..بس أول مافتحت النور حسيت بحد تانى فى الشقه غيرى أنا وأكرم ..شيلت أكرم بسرعه ودخلت أوضتى وقفلت الباب بالمفتاح  واتصلت على خالد وأنا مرعوبه وبترعش..  خالد أول مرة  أحس منه أنه خايف عليا أنا وأكرم. لما حكتله  اللى حصل من وقت ما رجعت من برة.. قالى خليكى على الخط  لغايه ما أوصل وفعلا فضل معايا لغايه مافتح باب الشقه  وبص لاقى المفتاح الرئيسى للكهربا مفصول شغله والكهربا  رجعت تانى،  وفتحت الباب وطلعت  لاقيته فى وشى و اخدنى فى حضنه وقالى متخافيش ممكن الفيشه نزلت لوحدها  أكيد الكهربا زادت بتحصل يا سحر أطمنى أنا معاكى أهو مفيش حاجه ... أنا فى اللحظه دى مكنتش عاوزة خالد يبعد عن حضنى . لأنى ولأول مرة أحس منه بحب وخوف عليا هو مسألش على أكرم كل قلقه كان عليا أنا .. بصلى وقالى هاا هديتى ..قلت له اها الحمد لله رد تانى وقالى طيب اقعدى أنا هاطلب أكل من برة ونسهر سوا تمام..

 أنا للحظه مكنتش مصدقه نفسى هو إيه اللى بيحصل دة هو دة خالد جوزى اللى متجوزاه ايه غيروة كدة مرة واحدة ؟

أنا من وقت ما أتجوزته ولا مرة سهر معايا  ولا حسيت منه أنه بيخاف عليا .فضل يلعب مع أكرم وفرح  بالألعاب اللى جبتها له وفرجته على الهدايا اللى جبتها لبنات اصحابى.والعجيب انه قالى تعرفى ان أمى محتفظه بكل ألعابى وأنا صغير فى الشقه اللى تحت .. وأنا عاوز منك تعملى لأكرم زى ما أمى كانت بتعمل معايا

وملحقش يكمل كلامه سمعنا حاجه وقعت فى الاوضه جوا 

يتبع

Hayam _Hassan#