#حكايه_ورا_كل_باب🏚️ #قصه_الأوراق القديمه..وروح حماتى#الجزء_٣

#حكايه_ورا_كل_باب🏚️  

#قصه_الأوراق القديمه..وروح حماتى

#الجزء_٣

عدى أسبوع على اللى حصل فى الشقه اليوم دة عمرى ما هنساه ابدا

خالد حسيته بيتغير  لما رجعنا مصر، يمكن الغربه والشقا والشغل بتاعه كانوا مخلينه كدة،من وقتها حسيت إنه فعلا خايف عليا وأبتدى يتصل بيا كذا مرة فى اليوم، ويطمن عليا ودة فى حد ذاته خلانى أبقا مبسوطه، وقررت إنى أتغير أنا كمان وبلاش أركز  فى أمور تضايقنى وأحاول أشغل نفسى ..فقررت ابدأ بالبيت قلت عاوزة أغير نظام الصاله وأدهن الصاله لون تانى مبهج كدة ، الشقه بقالها سنين مقفوله وفى تصليحات كتير لازم أعملها.جبت ورقه وقلم وقلت أكتب فيها كل حاجه ناويه أعملها ومفيش ثوانى   وشميت نفس ريحه البرفيوم تانى  أتخضيت،  

وخفت للنور يقطع تانى  ففتحت الكشاف بسرعه  ودخلت قعدت جنب أكرم وهو نايم . بس الغريب إن النور مقطعش. والريحه فضلت موجودة.بس انا سامعه سمعت صوت جاى من أوضه حماتى وحمايا.لاقيت ضربات قلبى بتزيد  وصوت نفسى ابتدى يعلا من الخوف ..فكرت أكلم خالد  وأحكيله  وبعدين رجعت تانى فى كلامى وقلت  مش كل شويه أقوله أنا خايفه ..قلت لازم أتحدى الخوف و أشوف أيه اللى فى الأوضه .مشيت للأوضه ومش قادرة أوصفلكم أنا أد إيه كنت مرعوبه وخايفه وخطوات رجلى  تقيله جدا وحسيت أن رجلى بتتحرك بصعوبه قربت من باب الأوضه ووقفت شويه 

قرأت (آيه الكرسى) والحمد لله هِديت شويه وبعدها أخدت نفس طويل وسميت بالله و فتحت باب الأوضه بشويش وفتحت النوربسرعه وبصيت كويس فى الأوضه لكن ملقتش حاجه ولا أى حد موجود .الله أومال إيه اللى سمعته دة أنا متاكدة إنه الصوت جاى من هنا وبعدين البريفيوم  شميته بقوة لما دخلت الاوضه و كل حاجه مظبوطه زى ماهى  الا..إلاااااا  .الصندوق اللى كان تحت السرير .لاقيته موجود على السرير فوق !!

قلت يمكن أكرم كان بيلعب بيه تانى  وسابه؟يووة أنا مش أقلق نفسى  وأقعد أفكر كتير لازم أشوف إيه اللي  موجود فيه حاولت أفتحه معرفتش قلت أكيد المفتاح موجود فى درج من الأدراج 

فتشت فى كل الأدراج، الشوفنيرة والكومدينو وفتحت الدواليب وفتشت فيها ملقتش أى مفتاح.. مسكت الصندوق  أقلب فيه يمكن الاقى المفتاح مستخبى فى مكان تحت الصندوق زى ما كنت بشوف فى أفلام زمان ملقتش حاجه،  مصمم بطريقه غريبة وكمان حاولت أفتحه بسكينه أو مفك ولا قدرت أنى أفتحه ..قلت خلاص  أحطه تانى  تحت السرير لغايه ما أسأل خالد عن مفتاحه أكيد يعرف 

..قررت أحط الصندوق تانى ومشغلش نفسى بيه وأنسى امرة ، واطلع أكمل باقى الحاجات اللى كنت  بكتبها عشان ابدأ فى توضيب الشقه . وفعلا رفعت الملايه وقلت أدخل الصندوق فى النص عشان أكرم مايلعبش بيه تانى و دخلت بنص جسمى  وزقيته يايدى لجوأكتر كمان.بس جايه اطلع اتخبطت جامد فى موله السرير  ولاقيت حاجه رنت على الأرض.. ببص لاقيته مفتاح!

مسكته للحظه قمت رميته تانى على الأرض وطلعت بسرعه من تحت السرير وجريت على برة وقفلت باب الأوضه ورايا.. ودخلت أوضتى  وبدأت افكر فى اللى بيحصل فى الشقه من وقت ما رجعنا 

ريحه البرفيوم وحركات فى الاوضه  ووجود الصندوق وإنى أنزل واتخبط يقوم المفتاح يقع عشان أشوفه ..لا لااااة  كل دة أكيد مش صدفه ،أكيد فى حاجه فى أوضه حماتى

 يكونش  الأوضه مسكونه؟؟؟

يتبع

Hayam Hassan