يا مرايه قلبى

يا مراية قلبي

كنتِ قدامي...

عينك بتلمع بشوق، وأنا واقف مكانّي متكتّف بأسرار تقيلة زي الجبال. مقدرش أقولك مقدرش أشرح فاخترت السكة الوحيدة اللي بتوجعني أكتر منك... البُعد.

كنت عارف إنك هتكرهيني وهتصدقي الكذبة اللي قلتها... إني بحب غيرك. كنت فاكر إن ده هيحميكي مني، لكن اللي حصل؟

 أنا اللي اتكسرت.

كل مرة بشوفك فيها والنظرة في عينك مش ليا بس، بقت لغيري... بحس إني بتعاقب على كل لحظة حبيتك فيها وأنا ساكت.

 الغيرة بتنهش في روحي

بتقول لي:

 "أهي راحت .

ضاعت منك...بإيديك."

بس لسه بحبك... والله بحبك.

بحبك بكل الوجع اللي جوايابكل الأسرار اللي مخبيها عشانك بكل الكذب اللي قلته عشان أحميكي.

 بس إزاي أرجع؟ 

إزاي أخلّيكي تصدقي إنك ليا وبس؟

عاوز أقولك... 

لو كل الناس حواليكي حبّوكي عمرك ما هتلاقي حد يحبك زيّي. لو الدنيا كلها قالتلك غير كده أوعي تصدقي.

رجوعك مش بس أمل ..

ده حياتي. لو تقدرِى تغفري..

 لو لسه في قلبك حتة صغيرة ليّا... أنا مستنيك. ومستني اللحظة اللي أقولك فيها كل حاجة وأثبتلك إنك أمان قلبي الوحيد.

بس أعرف... الغفران مش بالساهل. وثقتك اللي كسرتها مش هتتصلح بكلمتين. 

عارف إنك دلوقتي بتشوفي فيَّا حد غريب حد بعيد عنك حد ميستاهلش حبك.

بس لو هبدأ من جديد هبدأ من البداية.

هبدأ من اللحظة اللي وقفت قدامك فيها وقولتلِك بحبك لأول مرة من غير كلام، بنظرة عيني اللي مكنتش بتعرف تخبي.

هسيبلك كل حاجة مكشوفة قلبي أسراري.. دموعي اللي مخبيها من الدنيا كلها.

هكون صريح حتى لو صراحتي هتوجعك لأن الوجع الحقيقي هو إنك ما تعرفيش أنا مين جواك

 أنا قد إيه بعشقك.

أوعى تفتكري إن قربهم منك ما وجعنيش ولا إن ابتسامتك لغيري ما كسرتنيش. 

كنت كل مرة بشوفك معاهم، بتسألي في عينك: ليه؟

 وأنا كنت أهرب، أهرب عشان مش عارف أقولك الحقيقة وعشان خايف تخسريني للأبد.

لو ينفع أطلب منك حاجة أطلب فرصة. مش بس عشان أثبتلك إني بحبك، لكن عشان أثبتلك إن اللي بينا عمره ما كان لعبة ولا هيتكرر مع حد تاني.

عاوزك تلمسي في كلامي الصدق اللي كان غايب عاوزك تشوفي في عيني الحقيقة اللي مخبيها.

ولو قلبي قدامك مفتوح على آخره ولسه مش كفاية... مش هسيبك. هفضل أقاتل عشانك، عشان تثقي تاني، عشان تصدقي إنك مش مجرد حب عابر، إنتِ الحكاية كلها.

لو هترجعي... ارجعي لواحد قرر يواجه خوفه عشانك.

لو هترجعي...

ارجعي لعيني اللي معرفتش تحب غيرك، ولقلبي اللي لسه بيراهنك.

ارجعي حتى لو كان الطريق مليان شوك وظنون.

أنا مستعد أواجه كل حاجة إلا فكرة إنك تكوني بعيد عني للأبد.

ولو ما رجعتيش...

هفضل أحبك في صمت، زي ما كنت.

لأن الحب مش شرطه يكون قرب

لكن شرطه الوحيد... إنه يعيش.

Hayam Hassan