الفراق وجع مستمر

الفراق وجع مستمر

فترات الوجع والألم اللي بنمر بيها من أي فراق...الوجع اللي في القلب بيخلينا نفقد شغف الحياة نفقد الأمان نفقد الوجود في كل حاجة حوالينا.

الفراق بيخلينا دايمًا متخوفين من أي حد هيفارقنا بنعيش دايمًا بوجع خفي جوانا بنخاف نوصفه أو حتى نتكلم عنه.

الأمان والاطمئنان عمرهم ما كانوا حاجات ثابتة ساعات بنحس بيهم وساعات بيختفوا فجأة لكن الفراق... دايمًا عايش معانا وحوالينا في كل تفصيلة في كل ذكرى.. في كل نظرة ..لحد غالي كان هنا ومابقاش له وجود.. وبسأل

 ليه نتوجع؟ ليه نبكي؟ ليه نفارق؟

لكن يمكن الأهم من السؤال ده هو...

إزاي نعيش رغم الفراق؟

الحزن مش عيب ولا ضعف هو جزء من الرحلة وجع الفراق دليل إننا حبينا بصدق وإن اللي فقدناه كان ليه مكان في قلوبنا. بس الأهم إننا ما نسمحش للحزن إنه يسرقنا من الحياة ما نسمحلوش يطفّي النور اللي جوانا.

هنعيش رغم الفراق لما نتمسك باللحظات الحلوة لما نفتكر الضحكة قبل الدموع والونس قبل الوحدة. هنعيش لما نسمح لنفسنا نبني حياة مستقلة نلاقي الأمان جوانا مش في وجود حد حوالينا.

هنعيش لما نؤمن إن الفراق مش دايمًا خسارة أوقات بيكون درس أوقات بيكون بداية جديدة وأوقات بيكون فرصة نعرف نفسنا أكتر.

هنعيش لما نفتكر إننا مش لوحدنا وإن ربنا دايمًا معانا بيدينا القوة وبيحط في طريقنا نور حتى لو إحنا مش شايفينه دلوقتي.

هنلاقي القوة في كل مرة نقوم بعد الوجع في كل مرة نحس إننا وقعنا بس نقرر نقف تاني يمكن الفراق يسيب فراغ كبير جوانا بس الفراغ ده مش معناه نهاية ممكن يكون مساحة لحاجة جديدة تتولد لحب جديد لحلم جديد لحياة مختلفة يمكن تكون أجمل.

هنعيش رغم الفراق لما نعرف إن الحزن مش هو اللي بيحدد مصيرنا وإن إحنا اللي بنختار نفضل أسرى له أو نخرج منه أقوى. يمكن تاخد وقت يمكن الدموع تفضل تنزل كل ما نفتكر لكن في يوم هنبتسم وإحنا بنفتكر مش علشان نسينا بس علشان اتعلمنا

هنعيش لما نقرر إننا نستحق نفرح تاني من غير خوف وإننا نستحق نلاقي الأمان حتى لو مش في نفس الأماكن ولا مع نفس الناس.

هنعيش لما نحب نفسنا كفاية علشان ما نسمحش لوجع الماضي يسرق حاضرنا.

الخوف من الفراق طبيعي لكن الحياة مش هتوقف علشانه. هنكمل، هنقاوم وهنلاقي جوانا القوة اللي فاكرين إنها ضاعت مع اللي فارقنا

وفي الآخر... الفراق مش نهاية الحياة

الفراق مجرد فصل واحنا اللي بنقرر نكمل الرواية إزاي

HayamHassan